Haqqımızda

Azərbaycanda oyun düzəldən az deyil, amma onların işi çox vaxt Discord, Telegram və Instagram qruplarında bir-iki günə itib gedir. Prototip paylaşılır, bir neçə nəfər baxır, sonra lent onu aşağı itələyir.

Biz istəyirik ki, hər oyunun öz səhifəsi, öz oyunçusu və öz rəyi olsun. Game jam-də iki günə qurulan prototip də, illərlə üzərində işlənən layihə də görünməyə layiqdir. “Heç bir oyun qaranlıqda qalmasın” OyunRotor-un əsas sözüdür.

Onu itch.io ilə forumun qarışığı kimi düşün, amma yerli və tam Azərbaycan dilində.

• Oyununu yüklə: ZIP/RAR faylı və ya xarici link, cover, ekran görüntüləri və treyler.
• Özünü və komandanı göstər: kim nə edir, hansı oyunları düzəldib.
• Strukturlu rəy al: icma oynayır, nəyin xoşa gəldiyini və nəyin yaxşılaşa biləcəyini yazır.
• Forumda danış: suallar, devloglar, komanda axtarışı.

OyunRotor mağaza deyil. Burada satış, ödəniş və reklam yoxdur; söhbət oyunların özündən və onları düzəldən insanlardan gedir.

Rəy OyunRotor-un ürəyidir. Ulduz verməklə kifayətlənmirik: hər rəy üç sualdan qurulur.

• Nə xoşuna gəldi? Developer nəyi saxlamalı olduğunu bilsin.
• Nə yaxşılaşa bilər? Konkret, hörmətli və icra oluna bilən təklif.
• Hansı bug-ları tapdın? İstəyə bağlıdır, amma çox dəyərlidir.

Hər istifadəçi bir oyuna bir rəy yazır, öz oyununa isə rəy yazmaq olmur. Developer rəyə cavab verə bilər, oxucular da faydalı rəyləri qeyd edir.

Rəyi az olan oyunlar “Rəy gözləyən oyunlar” bölməsində önə çıxır. Beləcə yeni oyunlar populyarların altında itmir: əvvəlcə diqqətə ən çox ehtiyacı olanlar görünür.

• İndie developerlər və kiçik komandalar: işini göstərmək, rəy almaq və insan tapmaq üçün.
• Rəssamlar, səs dizaynerləri, ssenaristlər: komandaya qoşulmaq və portfolio qurmaq üçün.
• Tələbələr və game jam iştirakçıları: ilk prototipləri insanlara çatdırmaq üçün.
• Oyunçular: yerli oyunları ilk oynayan və onların formalaşmasına kömək edən olmaq üçün.

Hələ yenicə başlayırıq. Xalçanın naxışını ilk oyunlar, ilk rəylər və ilk müzakirələr müəyyən edəcək. Fikrin varsa, forumda yaz: platforma icma ilə birlikdə böyüyəcək.